Palarong  Pambansa  sa Davao

Ni FELIX B. DARAY

Matag tuig gihimo ang kinatas-ang tigi sa nagkalainlaing sports, o dula nga gisalmotan sa tanang rehiyon sa atong nasod gikan sa nagkalainlaing eskuylahan pribado o publiko ang—palarong pambansa. Kini gipahigayon sa Department of Education sa pakig-alayon sa local government diin himoon ang dula. Ang mga hinashasang mananaog maoy pilian aron dalhon  sa hataas  nga kompitisyon batok sa ubang nasod sama  sa Asean ug Olympic Games diin kita sa kanunay madasigong  miapil gikan sa kanhiayng mga katuigan.

Niining tuig 2015, ang Palarong Pambansa didto gipahigayon sa Davao del Norte Sports and Tourism Complex  (DNSTC), sa Tagum City gikan sa Mayo  3  hangtod 9,  nga pagaapilan sa 17 ka rehiyon.

 Mayo 4, 2015, sa ikaduhang adlaw sa dula, alas 3 sa hapon, gihimo ang opening program,  embis unta sa unang adlaw. Kini gihimo aron mahatagan ug kahigayonan ang tanan nga motan-aw sa away ni Manny Pacquiao ug Mayweather. Ug human sa away, gipadayon ang mga dula. Ang pagparada sa mga atleta nagsugod sa Provincial Government Center paingon sa DNSTC diin didto naghulat ang mga mamumulong sila si DILG Secretary Mar Roxas, TESDA Director Joel Villanueva, ug Davao del Norte Governor Rodulfo del Rosario. Hapsay ang dagan sa parade, diin ang sequence gasugod sa unang rehiyon, ikaduha, ikatulo hangtod sa ika 16. Ang nagpaulahi ang delegado sa host nga rehiyon, ang Davao Region (Davraa). Nindot ug sadya kaayong tan-awon ang mga athletes, diin nagsulob og lain-laing customs o identity sa ilang pundok. Sama pananglit sa Rehiyon 7, Central Visayas nga nagsul-ob silag custom sa Sinulog; ang Rehiyon 6, Western Visayas nagsenina og Ati-atihan Festival; ang Rehiyon 12, Soccsksargen nagdala streamers sa hulagway ni pambansang kamao, Manny Pacquiao; ug ang Rehiyon 11, Davao Region nagdala og dagko nga hulagway sa agila o philippine eagle ug uban pang customs sa nagkalailaing rehiyon. Kolorpul kayo ang parade uban sa mga coaches ug mga opisyales

Sa dihang namulong na ang amahan sa probinsiya, Rodulfo del Rosario, mikalit og kisdom ang langit. Tungod sa kabalaka sa pagbundak sa ulan, gisayloan ang ubang parte sa programa. Apan bisan sa pagbusagak sa ulan, gipadayon ang field demonstrations gikan sa estudyante ug mga magtutudlo hangtod nahuman. “Ang pag-ulan usa ka blessings ka lagi nagkinahanglan na kitag ulan,” pasiaw sa manan-away nga nagpasilong sa ilang payong.

 Pagkagabii, midasmag ang bagang duot sa black bug sa mga sugang dagitab diin naghatag ug kabaho  sa sports complex. Sa nagapadayong kompitisyon medyo nakahatag og gamayng kabalda sa mga atleta apan kayang gipadayon ang naka schedule nga mga events.

Gikan sa unang adlaw, gidugok sa bagang duot sa katawhan ang sports complex diin madungog ang nagkadaiyang suliyaw, siyagit ug pakpak sa katawhan sa ilang kasadya ug pagmaya nga live nakita ang dula. Ang ubang dula didto gipahigayon sa ubang lugar sama sa University of Mindanao, Tagum University ug ubang tulonghaan sa Tagum. Puno gihapon sa kadaghang mananan-away kay libre lagi.

Sa kataposang adlaw ug kataposang dula sa kampeyonato sa basketball elementary level, maoy gipunsisokan sa bagang duot sa katawhan diin nagtigi sa kataposang hunat ang host team, Davao Region ug ilang gipalukapa ang Western Visayas sa score nga 67-66.  Kini ang kataposang bulawan nga ilang nakuha ug unang higayon ever sila nahimong kampeyon.

Kataposang adlaw, Mayo 9 sa buntag gihimong ang closing program sa sports complex.  Segun sa naandan, gihimo ang unity parade diin nagpundok ang mga atleta ug kotses by region. Ang Armed Forces of the Philippines paratroopers mipakita og exhibition banners nga:  “DavNor Best Palaro, Tell We Meet Again, and Maraming Salamat po.”

Sa pakigpulong pa ni DepEd Undersecretary Tonisito Umali, “ Davao del Norte hosted the best palaro ever, the best palaro closing ceremony ever.” Ug sa kataposang pulong- pasalamat ni Gob. Rodulfo del Rosario, “ang (DNSTC), Davao del Norte Sports and Tourism Complex is the most active sports in the country; is now capable of hosting Asean Games,” pasigarbo niya. Sa pagkatinuod kini ang pinakabag-o, moderno ug spacious nga sports complex sa Pilipinas sa pagkakaron.

Ang nakahakop og kinadaghanang medalya mao ang National Capital Rehiyon (NCR): 98 ka gold, 67 ka silver ug 71 ka bronze. Kini karon ang tul-id 19 ka tuig nilang pagharos. Ang ikaduha mao ang Rehiyon lV-A, (Calabarson) nga nakakuhag 51-41-49  ka mga medalya. Ug ang ikatulong dapit ang Rehiyon 6, Western Visayas nga nakasungkit og 42-48-41 ka mga medalya..

Ang Davao Rehiyon nga maoy host niining tuiga, nakakuhag 13 ka gold, 23 ka silver ug 30 ka bronze. Misaka kita sa ika-siyam sa over-all standing niining 2015. Mipakita tag dugang katakos diin niadtong miaging 2014, aduna lamay 10-20-21 ka medalya ang nabitbit. Kini ang resulta sa dugayng panahon sa pagbansay diin usa ka bulan ang training didto sa Tagum. Nalipay kong gatan-aw sa akong apo, si Mahr Angelo Daray nga nahiapail sa volleyball boys elementary level sa Davao Rehiyon. ”Bisan mig nangiwit didto, apan nalipay ko kaayo, once in my lifetime tingali ning higayon nga nakaapil ko,” niya pa.

Gawas sa mga medalya nga ilang nabitbit, ang tanang athletes adunay  cash allowance  nga dili moninos sa l0 mil pesos depende sa rehiyon ug ubang mga incentive fees. Hinuon, nalipay ang tanang delegasyon tungod kay ang 17 ka rehiyon  nga miapil, nakabitbit gyod og pinakaminos duha ka  bulawan sa ilang pagpamauli.

Mabuhi! ang 2015, Palarong Pambansa.