Si Cabang: Irong Bayani

Si Cabang: Irong  Bayani

Ni Felix B. Daray  ( napatik sa Bisaya, Hulyo 3, 2013)

               

                Ang iro giila nga pinakamahigalaon nga hayop o most friendly animal. Inig abot nimo sa balay gikan sa imong lakaw, malipayon kaayo nga mokitiw-kitiw ang ikog ug molukso-lukso sa kahinagop. Dili madinumtanon. Kon imong bunalan kay nakasala, pagka taod-taod, mokitiw ang ikog kon imong tawagon.

                 Ang  German Sheperd,  gimanso sa mga army nga sniper sa bomba. Atong  makita sa mga terminal nga maoy pasimhoton sa mga bagahe. Kadtong dagko nga iro nga gitawag og Polish dog, gihimo nga security sa mga dato kay kaya nilang pakaonon ug karne.

                Atong mahinumdoman kadtong iro nga si Saver nga sikat kaayo sa TV kay daghan og tricks nga mahimo ug masugo pa gyod.  Daghang paagi,  maingon ta nga makatabang ang iro gawas  nga mobantay sa atong balay. Atong tukion karon ang makasaysayang si Cabang nga nahimong bayani.

                Didto sa Zamboanga City sa Nunez Extention, namimuyo ang magtiayong Rudy Bunngal, usa ka bolkanayser. Ang iyang asawa si Christina, adunay gamay nga tindahan. Sa ilang barangay, si Rudy ang giila nga numero  unong butcher sa iro ug master pagluto sa azusena. Ang ilang buhing iro dili maabtan ug dugay kay ilang ihawon. Usa ka adlaw niana, ang ilang anak, si Dina nakapunit og itoy likod sa ilang balay. Ilang gibuhi iyawat na lang maihaw kon modako na. Gianggaan nilag si Cabang.  Ang iro maoy kanunay nga kadula ni Dina ug sa iyang pag-umangkon nga si Princess. Kanunay magkinawrasay, magluksoanay ug  magginukdanay palibot sa balay. Midako na si Cabang. Si Christina nakaingon sa iyang kaugalingon, “maayo si Cabang kay wa matripi nga ihawon.”Iya  pod nga namatikdan, si Rudy, daw maayo  ang iyang pagtagad ni Cabang, ug gani makigdula siya. Kanunay mo “aw –aw” kon naay tawo nga moabot sa balay.

                Disyembre 2012, mahiabot ang iyang anak uban sa iyang pag-umangkon nga nagdali pagpauli sa balay. Layo pa , miusig na si Cabang ug mikiwig-kiwi g ang ikog timailhan sa kalipay. Sa dihang duol sa sila sa bay,mitabok sila sa karsada  nga way paglantaw nga may motor nga moagi. Milukso si Cabang sa duha og didto nabuggo ang iyang simod sa mga rayos sa ligid sa motor. Nagkadugo. Ming-aw-aw si Cabang sa kasakit. Ang mga bata wa naunsa. Kay kon wa pa sila luksoi ni Cabang, sila gyod ang mabanggaan sa motor.

                Pinaagi sa beterinaryan sa ilang  city health, gihatagan si Cabang og mga anti-biotics. Dili nila kaya operahan ang daot niyang simod.Naglisod sa pagkaon; hinungitan kanunay. Ang kabantog ni Cabang nikuyanap sa mga  mantalaan, sa TV, sa social network og ngadto sa internet. Usa ka dog lover,  si Karen Kenngott, critical-care nurse sa Buffallo New York nagsugod og on-line campaign sa internet og donasyon para sa pagpatambal sa iro. Sa dihang nakatigom nag ubay-ubay nga kantidad, gidala si Cabang sa USA sa University of California School of Vetirenary Medicine, sa Davis California. Didto gihimo ang makuting eksaminasyon. Na dayagnos nga kanseros ang iyang nabali nga simod. Gihimo dayon ang reconstructive surgery ug dental repair sa iyang naguba nga bag-ang.  Tungod sa kaeksperto sa mga doctor didto, hingpit ra gyod nga naayo si Cabang. Mikabat og 10,000 dollar ang gasto sa hospital. Kon sumadahon ang tanang gastos gikan sa Pilipinas ug  pabalik, moabot og P2,000,000.00 pesos. Wow, kadako nga kantidad para lang sa iro!

                 Hunyo 5, 2013 nahibalik si Cabang sa Piipinas ug nahiuli sa iyang agalon.Dili matukib nga kalipay sa magtiayong Bunggal sa pag-abot  sa ilang bayani. “ Si Cabang  gasa nako gikan sa Kahitas-an,” matod pa ni Rudy . “ Dili na gyod ko mopasila sa mga iro, ug gani karon, dili na ko ganahan moluto og azusena. Salamat sa may mga malumong kasing-kasing nga mihatag og donasyon kang Cabang,” dugang pa niya.

                Atong panggaon ang atong buhing  iro. Sila sama ra kanato. Atong tamdan ang karaang panultihon sa English, “Be kind to animals.”

                Mabuhi ka Cabang, ang atong bag-ong iro nga bayani!

Summer 2013,sa Digos Central Adventist Academy (DCAA)

Malamposon ug Masadya nga Summer sa  DCAA, Digos City

Ni Felix B. Daray   (napatik sa Bisaya , Hunyo 19, 2013)

            Niadtong Mayo 16, 2013,  alas 4 sa hapon  hangtod sa alsa 7 sa gabii, gipahigayon ang malampusong ug  masadya nga 2^nd Annual Extravaganza  and Recognition Cerenomy, sa SDA Church, sa mga nakatapos nga nagkadaiyang subjects  sa  summer classes sa Digos Central Adventist Academy. Ang DCAA usa sa mga prebado ug prestihiyosong tulunghaan sa maong siyudad nga mag-umol sa atong mga kabataan sa academics, moral ug spiritual Christian life.

            Niining ikaduhang tuig, karon  nga summer, madasigon ug makugihon ang mga ginikanan nga nagpaenrol sa ilang mga  kabataan edad 4 pataas nga miabot og 100 ka pupils. Halos gipilo og kaduha nga sa unang tuig aduna lamay 5l ka bata. Kini maoy timailhan sa paglambo sa maong tulunghaan. Adunay short courses sa tanang subjects gikan sa nursery ngadto sa Grade 6  sama sa basic reading, writing, Mathematics MTAP review ug uban pa. Ug ang pinakanindot ug gihugopan mao, ang pagtuon sa basic courses sa musical instruments sama pananglit sa piyano, gitara ug bayolin. Ug gani sa sunod tuig, aduna na silay voice lesson aron mabansayg maayo ang mahiligon sa pagkanta.

            Ang tanang mga kabataan nga nagkuha sa piano lessons  mipakita sa ilang nahibaloan ug namaster  nga pisa o  piece. Nahipugwat kos kalipay diha sa akong gilingkuran sa dihang mitugtog na ang akong apo, si Mark Joshua Juntilla sa iyang recital piece nga “London Bridge” sa piyano. Ang iyang inahan nga si Marites, mapahiyumon kaayo nga naglantaw sa kalipay,  ug  mipakidlap sa iyang kamera iyawat makakuha ug hulagway. Sa akong paminaw, “nindot ug excellent ang akong ihatag nga grado.” Dili ako nakatuo nga  sa hamubo lamang nga panahon, mga 22 sessions makamao na ang mga kabataan motugtog. Hasta usab sa mga bata nga mikuha sa guitar lesson, makamao  nang moduyog sa mga nagkanta nga nag-aawit. Mao usab ang mga nagkuha sa violin lesson, nga bisan gamay pang bata, makamao na gyod mo “ngik-ngik” sa bayolin. Moingon ako nga maanindot ang recital tungod kay ang mga kabataan ra sa maong tulunghaan ang mga recitalists.  Madasigon ug mabulokong pakpak gikan sa mga ginikanan ang atong nadungog human sa matag participante. Nagpangidlap ang nga kamera sa pagshot samtang nagperporm ang mga kabataan. Ug gawas pa, adunay imbetadong pundok nga gitawag ug Trendz nga mipakita sa ilang kahanas sa pagkanta sa Extravaganza Number, “Seasons of Love”. Tanang mga kabataan nga mikuha ug summer classes, makita sa entablado nga nagpakita sa ilang skills nga natun-an. Adunay Grade  School Production Number sa nga nursery pupils nga giubanan sa lipsing, nga mora pod ug sila ra gyod ang tinuod nga nagkanta. Nindot kaayong paminawon ang musical rendition sa bayolin  ug saksupon nga gitugtog sa mga musical instructors.

            Human sa recital, gisunod pagpanghatag ang mga gold ug silber medals ug certificate of recognation sa mga deserving nga kabataan. Adunay gihatag sa mga bata nga best in reading, best in writing, best in piano, best in violin ug daghan pang  mga best aron madasig ug malipay ang mga kabataan. Mipaso sa stage ang mga kabataan uban sa ilang mama  o papa sa ilang pagdawat sa award. Dili matukib nga kalipay sa mga ginikanan nga nagsud-ong sa ilang mga anak nga nakasaksi sa mga magkalain-laing  abilidad  o skills  nga nakat-onan sa  Summer Classes 2013.

            Kining maong programa gitambongan sa pinasidunggang mamumulong gikan  sa DepEd Region 11, Program Supervisor for Private Education, Dr. Purificacion Yambao; kauban usab niya si Dr. Reynante Solitario, Regional Supervisor sa Mathemtics. Matod pa ni Yambao, “ this is a very great success to the school and children for this summer time.” Sa wala damha, si Solatorio nga nahiligon  ug maayo pod nga mokanta, mipalanog sa iyang maanindot nga tingog sa awit nga “Ikaw.”

            Ang Digos Central Adventist Academy (DCAA) natukod pa niadtong 1984, naa mahimutang sa Lapu-lapu Extension sa Digos City nga gidumala ni  Mike Allarde, HR Admin.,  ug Dr. Elizabeth Benedicto, isip bag-ong School Director;  kauban sa pakig-alayon  sa mga Board of Directors nga gipanggulohan ni Felimonito B. Villegas, Jr. Matud pa ni Benedicto, ug pasidaan sa mga ginikanan, “ sa sunod tuig magsugod na  sa pag-abre  sa klase, school year 2013-2014, ang Grade 7 ug Grade 8, o high school subay sa K-12 nga programa sa DepEd.”

            Babay summer, ‘till we meet again next year! 

Ang akong Pagsalga-salga sa Panitik sa Sinugbuanong Binisaya

Ang akong Pagsalga-salga sa Panitik sa Sinugbuanong Binisaya

Ni Felix B. Daray   (napatik sa Bisaya Magazine Disyembre 18, 2013)

            Digos City

          

  Niadtong 2008 sa dihang misuway  kog sulat sa unang gumalaysay nga nag-ulohan,” Ang Malambuong Produksiyon sa Mangga sa San Roque Digos City,” dinhi sa Bismag, naglisod gyod kog espel sa mga pulong. Naglibog kos sa “U” ug “O” kon asa ang mouna. Pagkahuman og edit, ako gyong gipadala sa koreyo. Daw gibayaw ang akong kasingkaing dihang nagteks ang akong kababata sa Bohol nga nakabasa sila sa akong gisulat. Apan bisan og giunsa nakog suhid ang Siyudad sa Digos, wa gyod ko kapalit sa maong gula sa Bismag aron unta masusi ang sayop nga espeling sa mga pulong nga may “U “ug “O,” “E”ug “I.” Nagtuo man gani ko nga di makapasar sa editing.

            Niining higayon, tugoti akong nga mosalga-salga  ning panagbangi sa mga  hunahuna sa  banggiitang mga magsusulat  sa dilang Binisaya nga gisugdan ni Gremer Reyes ug Ernesto Lariosa bahin sa tukmang paggamit sa “U” ug  “O.” Nakabasa ko sa epiko nga sinulat sa naulahi dinhi sa Bismag nga giulohan ug “Kalisub.” Gihangak  kog binasa kay way comma, period o tuldok. Estayl  kaha niya kini o identity sa iyang gimugnang dagang sa pinulongang Binisaya?

            Sa dihang nangita kog Bismag diri sa Digos, gikabagat ko si Sandry Nicandro usa ka anawnser sa am radyo sa Davao kanhi ug nagsulatan usab sa Bismag. Gipabasa ko niya sa iyang sinulat nga naulohag “Naguol ko sa Padayong Sayop nga Espeling sa mga Pulong Binisaya”  gula sa Septiyembre 12, 2012. Matud pa niya, “ kanunay nakong mabasahan sa mga lokal nga mantalaan sa Davao del Sur  ug North Cotabato ang mga sayop nga espeling sa mga pulong sama niini: matud, nasud, libut, katapusan, akung, gayud, isa, ug uban pa.”

            Sa maong gula, dihay tubag ni Editor Edgar Godin nga ang mga Batakang  Tamdanan sa Binisaya ilabi na sa Lagda sa Espeling mabasa sa website sa Bisaya:http//bismag.pbworks.com

Nia ang porsiyon  sa akong nabasa sa Lagda sa Espeling:

”Ang "U" ug "O" sa Mga Pulong Lintunganay (Root Words)

Ang mga pulong lintunganay mao kadtong mga pulong nga wala langgikiti.

1. ‘U' ang gamiton sa una ug sulod nga (mga) silaba sa mga pulong lintunganay, samtang ang ‘o’                 anha gamita sa kataposang silaba sa mga pulong lintunganay.

Mga Pananglitan:

Unang Silaba:

bughat, kusi, tulo,,buang, buto, pulo (island) umagad ,ugangan, ug-og, mug-ot, gun-ob, dugho,       bugan, sud-an, pus-an, kulang, ulan, tulon, gubat, bugti, dugnit,gusbat,

 Sulod nga Silaba:

Hapuhap, pangutana, habuhabo, bituon, taudtaod, sagunson,haguka,hinuon, turutot,                 bukubuko, hugunhugon, puhunan, gitulisok

Kataposang Silaba:

Pako, dako, tulo, matod, nasod, lungsod, balod, gakos, sakob, barog, taob, turutot, huyuhoy,   himo, panimalos, hisgot

Ang patingog nga "I"

2. Ang "i" gamiton sa tanang lumad nga pulong gawas sa mga pulong "babaye", "pangadye", "dayeg" ug "sikwate".

Mga Pananglitan:

Bitin, hait, bituon, kanding, sigbin, iti, tagiptip, kuting,tai

Ang "U" ug "O" sa Mga Pulong Linanggikitan (Affixed Words)

3. Magpabilin ang han-ay sa 'u' ug/o 'o' sa pulong lintunganay diha sa mga pulong linanggikitan, o kon ang mga pulong lintunganay gitapoan na sa mga iglalanggikit.

Mga Pananglitan:

 himoON -- gikan sa ‘himo’, gisumpotan sa ‘ON’

 himoAN -- gikan sa ‘himo’, gisumpotan sa ‘AN’

  handomANAN -- gikan sa ‘handom’, gisumpotan sa ‘ANAN’

  hALandomON -- gikan sa ‘handom’, gisal-otan sa ‘AL’ ug gisumpotan sa ‘ON’

 sangpotANAN -- gikan sa ‘sangpot’, gisumpotan sa ‘ANAN’

 lungsorANON -- gikan sa ‘lungsod’ (d/r), gisumpotan sa ‘ANON’

  KAbungsorAN -- gikan sa ‘bungsod’ (d/r), gilanggikitan sa ‘KA’ ug gisumpotan sa ‘AN’

KAlibotAN -- gikan sa ‘libot’, gilanggikitan sa ‘KA’ ug gisumpotan sa ‘AN’

bULuhatON -- gikan sa ‘buhat’, gisal-otan sa ‘UL’ ug gisumpotan sa ‘ON’

sULugoON -- gikan sa ‘sugo’, gisal-otan sa ‘UL’ ug gisumpotan sa ‘ON’

tULunghaAN -- gikan sa ‘tungha’, gisal-otan sa ‘UL’ ug gisumpotan sa ‘AN’

igsoON -- gikan sa ‘igso’, gisumpotan sa ‘ON’

MAtINahorON -- gikan sa ‘tahod’, gilanggikitan sa ‘MA’, gisal-otan sa ‘IN’, ug gisumpotan sa ON’

tULumanON -- gikan sa ‘tuman’, gisal-otan sa ‘UL’ ug gisumpotan sa ‘ON’

(Timan-i: Tungod kay walay tunganggikit (infex) sa Binisaya nga may titik 'O', wala gayoy pulong                 nga may titik 'O' sa tunga o sulod nga silaba gawas sa mga pulong hinulaman gikan sa Iningles o Kinatsila, ubp. Sa mga gamotpulong nga gibalik-balik paglitok nga may titik 'O' sa sulod o tunga nga silaba, kini gi-justify sa haypen pagpasabot nga kana pulong gamot nga gisubli lamang paglitok. Hinungdan usab nga ang pulong 'hunahuna' dili angay haypenan tungod kay dili man       pulong gamot ang 'huna'.

                Nahayagan og maayo ang akong salabutan ug nadasig sa pagsulat niining atong  nag-unang sinemanang magasin sa Binisaya. Kay mao pa lagiy pagtuon-tuon sa sa kompyuter, naglisod ko pagpadala sa email. Matod pa ni Sir Godin sa iyang text, nga gibudlay siyag edit sa akong gi-email kay nagdikit ang mga pulong, way lat-ang matag pulong. Iya kong gitudloan nga  kon magsugod og lain nga parapo; enter unya tuslokon ug kausa  ang tab. Tuod man, nakita ra ang sayop.

            Segun sa lagda sa  espeling sa mga pangalan sa mga tawo, lugar ug brand sa mga bprodukto dili angay usabon. Sa gula sa Disyembre 4, 2013, matod pa ni Ricardo Tubio nga ang iyang apelyido giusab og Tubio gikan sa Tobio kay ang  litrang “U” sunod sa “T”. Alphabetical  arragnment ang gibasehan , niya pa. Apan klarong wa kita nianang  gitawag og ‘alphabetical arrangement.’ Dili pod kabasehan ang paglitok sa mga pulong tungod kay sa laing lugar naa silay kaugalingon tono sa  paglitok sa U ug O. Kadaghanan diri sa Mindanao, ang Binisaya nga Sinugbuanon, pareho ra man ang tono sa U ug O. Bisan gani ang E ug I, pareho ra usab ang tono.

            Sa atong  high tech  nga panahon karon,  ang pag-espel sa mga pulong sa teks bisan giunsa na lang pag-shortcut  basta masabtan lang. Tugotan ta lang diha nga lugar, apan dili sa mga mantalaan ug magasin. Atong sundon ang Ladga sa itaas nga gigamit sa mga magsusulat sa Bismag  aron padayong molambo ug magpabiling lig-on ang  dilang Binisaya. Kining maong sinemanang mantalaan nga Bisaya mao ray establisadong magasin diin atong mabasa ang nagkadaiyang literatura nga Binisaya: balak, gumalaysay, sugilanon, komiks, balita, pulongbay, mga kulom, gitikgitik ug uban pa.

            Ang magasing Bisaya nakig-alayon sa DepEd sa paggamit isip medyum sa pagtudlo ubos sa pag-endorso sa akademiyang Bisaya Foundation pinaagi sa usa ka resolusyon nga ang  spelling system nga gitamdan sa magasing  Bisaya maoy opisyal nga sagupon sa ABF ug sa DepEd-7 diha sa implementasyon sa D.O.74.

            Na hala, suwat no mo; atong sundon ang lagda sa espling sa itaas.

           

           

         

Araw ng Davao 2014

Araw ng Davao 2014

ni Felix B. Daray

            Niadtong Marso 16, 2014, gisaulog sa mga lumulupyo sa Siyudad sa Davao ang ika-77 nga pagkahimugso isip chartered city niini, ang naila nga Araw ng Davao. Human sa Pasko mosunod kini; ang labing alegre, labing sadya, hinugopan sa katawhang Dabawenyo ug mga turista.

            Sayo pa, niadtong Pebrero 17, sa gabii, gipahigayon na ang screening sa mga pilionon sa Mutya ng Davao 2014 didto sa Royal Mandaya Hotel. Unya gisundan ang public presentation sa mga kandidata sa NCCC Mall pagka Pebrero 21. Masipang pakpak ug siyagit sa katawhan ang atong nadungog sa nagkalainlaing benyu diin gihimo ang ubang mga kalingawan.

            Marso 1, gisugdan ang Agri Trade Fair diha likod sa ground floor,  SM City sa  Ecoland  diin makita ug makasud-ong ka sa ilang kaanyag, ug makapalit kita  ug nagkadaiyang mga bulak sama sa orchids, walingwaling; indoor and outdoor  plants nga adunay nagkalainlaing kolor; grafted nga mga bungahoy o fruit trees.Kining kalihokan nagapadayon hangtod pa sa kataposan ning bulan.

            Marso 3, gihimo ang opening program diha sa Quezon Park. Matod pa ni Kag. Al Ryan Alejandre, spokeperson “wala kitay tema ning tuig; mao lamay atong sundon ang gitawag nga Araw ng Davao 2014. Mao kini ang foundation day isip paghatag ug pasalamat sa mga nagpuyo sa Davao. Adunay budyet nga P1,152,000 nga mas dako sa nangaging katuigan.”

            Marso 13, gihimo ang prestihiyosong pagpili sa aktibong Dabawenyo nga adunay exceptional o talagsaong kontribusyon sa pagpalambo sa siyudad, ang gibantog nga Datu Bago Award .Ang awarding didto Royal Mandaya Hotel nianang pagka gabii.”Usa lamang sila sa gipasidunggan sa usa ka gabii ug higayon nga subling miutingkay sa mga maayong butang nga dunay dakong gikatampo sa palibot ug kinabuhi sa matag Dabawenyo,“ pamahayag pa ni Mayor Rodrigo R. Duterte, nga  miuyon o -concurrence  sa maong pagpili nga gidumala ni Dr. Guillermo P. Torres, Jr.

            Ang mga palarang napili mao si kanhi City Mayor Elias B. Lopez (posthumous) ug si Dr. Perfecto A. Alibin, ang kasamtanang presidente sa usa ka dakong state college dinhi sa habagatang sidlakan sa rehiyon onse.

            Si kanhi Mayor Lopez giila sa iyang mga legasiya nga maoy nagmugna o nag-institutionalized niining selebrasyon ug ang awit nga “Tayo ay Dabawenyo,” isip maoy  Davao Hym o awit sa siyudad.  Siya usab ang naghiusa sa nagkadaiyang tribu nga maoy dalan sa kamugnaan sa “Kadayawan Festival”  nga giselebrar rmatag Agosto. Garbo sab siya sa mga tribung Bagobo nga nahimomg mayor bise mayor, konsehal ug kongresman sa siyudad ug giila nga “Oustanding  Public Servant” sa iyang kapanahonan..

            Si Dr. Perfecto A. Alibin, kasamatangang presidente sa University of Southeastern Philippines. Iyang  gipalambo ang tulunghaan sa hustong pamaagi, disiplina nga miresulta sa maayong kalidad sa edukasyon, ug naila ang siyudad ngadto sa mapa sa ‘academic world.’ Nagsugod siya nga yanong magtutudlo, nahimong dean, director, researcher, consultant, vice president ngadto sa pagkapresidente karon.

            Sa Marso 14, gihimo ang highlight sa selebrasyon, ang Mutya nga Davao Coronation Night  didto sa Davao City Recreation Center, alas siete sa gabii.Ang mananaog nga giilang labing maanyag ug talentadong Dabawenyo mao si Franchesca Enriquez, 21- anyos, staff assosiate sa Reyes Tacondong & Co. Ang first runner-up o Diwa ng Davao mao si Mary Joyce , 18-anyos, nagtungha sa University of Mindanao; second runner-up, o Sinag ng Davao, si Jowielle Dawn Dogma, 20-anyos, nagtugha usab sa University of Mindanao; third runner-up o  Pag-asa nga Davao,  si Angelie Villa, 19-anyos, estudyante sa Ateneo de Davao University;  ug ang fourth runner-up o Patnubay ng Davao, si Kristine Joy Agcopra, 19-anyos, usa ka cabin crew sa Cebu Pacific.

            Alas otso sa buntag, Marso 15, gipasundayag ang Sayawan sa Da’n diha sa dalan San Pedro. Ang mga partisipante naggagikan sa mga tulunghaan publiko ug pribado ning siyudad. Grabe kaalegre! Ang mga kabataan nag-ikid-ikid dungan sa tugtog sa banda uban sa kasadya ug pagmaya sa ilang mga dagway.

            Sayo sa  buntag, Marso 16, gipahigayon ang Misa-Pasalamat diha sa San Pedro Cathedral ug unya gisundan sa  civic parade nga  gitawag karon og Parada Dabawenyo agi sa San Pedro Street, CM. Recto ug Magsaysay Avenue, ang giila nga mga pioneer nga kalye sa siyudad. 230 ka gatos ka mga contingents  gikan sa nagkalainlain sektor ang misalmot. Bisan sa kainit sa panahon, nindot kaayong tan-awon ang mga partisipante nga mapahiyomong nagbaklay samtang sa kilid sa kalye diha ang mga nanan-away nga mokidhat kon makita nila ang ilang kaila. Dunay kumpas ang lakang kuyog sa tugtog sa banda.

            Agig pagpaluyo sa kalihokan, gikatag ni Senior Police Superintendent Vicente D. Danao, Jr, ang 2,000 ka  barangay tanod ug dul-an sa 2,000 ka mga polis  sa agianan sa parade aron masiguro ang kahapsay ug kalinaw sa parada. Gidili gyod sa pagdala og bisan unsang bag kon apil ka sa parada. “Subay sa kasaysayan sa mga dagkong aktibidad sa Davao, karon pa gyod nga way bisan usa nga natala sa San Pedro Police Station, “ pamahayag pa ni Supt. Joel Consulta, hepe sa maong presinto.

            Sa mga mall nagpunsisok ang katawhan sugod niadtong Maso 14, ang gipasiugdahan nga Big Davao Fun Sale diin ang mga baligya miusos nga tagatuhod na lang ang presyo uban sa dako nga discount. Kini giapilan sa upat ka mga dagkong mall: SM City Mall sa Ecoland, Abreeza Mall, SM Lanang Premier ug Grand Gaisano Mall, ug uban pang dagkong supermarket.

            Bisan nahuman na ang mga dagkong aktibidades nga maoy nagdan-ag o highlights sa Araw nga Davao 2014, nagpadayon pa ang ubang kalingawan hangtod pa niining bulanan, sa nagkalainlaing benyu sa mga sports festival sama sa billiard, chess, Kayaking, body building,  arnis, tchouckball, volleyball, karatedo ug uban pa.

Balik –Lantaw sa Davao

            Ang Davao, matod pa, naggikan sa mga pulong davoh, dudwow, davau nga gilitok sa mga lumad nga tribung Tagabawa Bagobos, nga naghulagway sa Davao River. Kon imong pangutan-on kon diin ka gikan o asa ka paingon, motubag nga davoh ug motudlo sa direksiyon sa lugar nga karon gitawag og Trading. Ang  duhwow nagkahulogan og lugar diin didto magbarter ang mga natibo ug Insek sa mga produktong lagutnon, asin, hinabol nga tela, panapton ug uban pa. Kining lugar karon gitawag og Boulevard.

            Sa 1948, nahiabot dinhi si Don Jose Uyanguren, usa ka Espanyol aron pagkaylap sa Kristiyanismo. Iyang gitawag ang lugar og Nueva Vergara ug nahimong unang gobernador. Mao bitaw nga ang kalye Magsaysay Avenue, tawagon gihapon ug Uyanguren, tungod kay naila na gikan pa sa kanhiayng panahon. Sa 1903, nahiabot usab dinhi ang usa ka Hapon nga si Kichisaburo Ohta sa pagtugot sa mga Amerikano. Gipalambo niya ang agrikultura sa pagpananom ug abaka, lubi ug saging. Nagsugod pagdayo ang mga tawo gikan sa Bisayas ug Luzon aron manarbaho sa plantasyon. Nag-ukopar  silag mga  yuta; nanamon, hangtod nga milambo ang  negosyo ug mga patigayon Davao

            Sa Marso 16, 1936, si Kongresman Romualdo Quimpo nagpasaka og balaodnon, ang Bill No. 609, Commonwealth Act No. 51 nga nagmugna niini isip usa ka siyudad. Giinawgurahan isip usa ka chartered city niadtong Octobre 16, 1936. Gikan niadto, ang siyudad nahimong kapital sa wa pa mabahin nga probinsiya sa Davao. Unya nahimong independent city sa dihang nabahin sa  tulo ang Davao.

Ang Siyudad sa Davao karon

            Ang Davao City giila nga usa sa mga dagko nga siyudad sa kalibutan kon basehan sa area niini nga 2,443.61 metro kuwadrado; ikatulo sa Pilipinas ug nag-una sa Mindanao. Giila usab nga most visited city aron pagtan-aw sa Mt.Apo ang pinakataas nga bukid sa Pilipinas ug pagsud-ong sa Philippine eagle. Ang siyudad adunay 182 ka barangay ug tulo ka kongresyonal distrik. Base sa Census and Statistics 2010, miabot nag 2.26 milyones ang mga lumulupyo sa siyudad; ug sa pagkakaron moabot na kita og 2.5 milyones. Milambo ang mga patigayon, halapad nga plantasyon sa saging ug prutas. Dinhi natukod ang mga dagkong kolehiyo. Ug karon ang Davao mao ang regional center sa Southern Mindanao. (Region 11). Sulod sa mga duha ka dekada, gidumala ang siyudad sa mga Duterte. Niadtong maging eleksiyon nahibalik si Rodrigo Duterte pagkamayor nga way kalaban. Ug karon, kauban niya sa pagdumala sa siyudad, si Paolo Duterte, iyang anak isip besi mayor. Tungod sa maayong pamaagi ug ledirato sa pagdumala sa siyudad, migawas ang estorya karon, nga ‘Duterte for President’ para sa 2016 eleksiyon.

      Mabuhi ka Davao City! Padayon sa unahan sa imong malamboon ug makugihong pag-uswag.